|
Ja siebzehn Jahr, und no voll Schwung a lange Zeit, und doch no jung. Vor siebzehn Jahr, Ihr wißts es eh ist gegründet worn der SVT.
Do ham sich a paar zamma do an der Spitze der Bengl Hermann und da Lehrer, der guade Mo. weil doch für d`Junga doch bei uns wos feit und ham an Sportverein aufgste`it.
1968 wars Grüngungsjahr dass wir des feiern is ganz klar. A Grund zum feiern is des scho weil sovui hot sich seither do.
D`Mitglieder san mehra worn oa san leider aa scho gstorbm. An de wui i an der Stell gedenga Und aa a wengal d`Achtung schenga.
Fuchzg Mitglieder warns am Anfang gwen noch oan Jahr aber sans scho bei 200 gleng um 420 aber hamma heit a stolze Zahl, a haufa Leit. Für jedn is jiatz ebbas do mitn fuaßballspuin gings damois o. Dass do aa ois laaft und stimmt, is er dahinter, da Spartnleiter, daa Ollert Günther.
Hot wer sei bsondre Freid am Schiaßn dann braucht dem gar ned glei vodriaßn. Für de, de gern mit Blei rumspritzn do gibt´s an Clement mit seine Schützen. Wenn jeda nur auf Scheibn taat schiaßn und ned auf d`Leid, s`waar zum begriaßn. I moan jiatz auf da ganzn Welt dann waars um d`Menschheit besser gstellt.
Und d`Tennisspieler frisch und munta, de laafan sich die Pfunde runta. Da Ball fliagt hin, da Ball fliagt her, und den zu treffa is oft schwer, Doch wer`s guad ko, der trifft scho der Meier Hans der war do da erste Mo.
Für a gsunds Kreuz und stramme Wadl huift bei de Frau`n und bei de Madl d`Frau Graf in da Gymnastikstund und is da Po aa noch so rund nach drei, via Abende, gottseidank is jede wia a Rehgoaß schlank. und fühlt sich umadum glei gsünda glatt mindestens a paar Jahr jünga.
Ja ollerhand gebats dazua zum sogn des werd waar, zum hervorhebn und lobn und dass aa weiterhin olles stimmt und passt, des wünsch eich i, da Gerbl Wast!
Und für den der ned d`Mundart lesn ko heng i no den Anhang dro:
d`Mundart lesn is zwar schwer aber im Mundart schreiben no vui mehr. Ihr müaßts es hoid a paarmoi probiern, dann werds es schliaßle scho kapiern.
Ein weiterhin so erfolgreiches Wirken der Vorstandschaft und allen Aktiven wünscht euch
|
